الرئيسية / خواطر / صرخة بالعامية

صرخة بالعامية

تمن سنين حرب خلت أي شي كذب يكون حقيقة وأي حقيقة تكون كذب.. هذا الشي ضيع العالم وخلى الناس تفقد ثقتها وإيمانها بأي شي.. لا الرفقة ضلت متل قبل.. لا الحب ضل متل قبل.. لا العيلة ضلت متل قبل.. ولا حتى ألافكار ضلت متل قبل.. صرنا هيك كلنا قشة لفة.. ولاد حرب..

متفرقين جغرافيا وفكريا.. كل واحد فينا باني امبراطورية لحاله ومنصب حاله عليها امبراطور.. صرنا كذا شعب.. شعب تحت الحصار وشعب تحت الحرب وشعب منفى وشعب نص منفى وشعب ضايع.. بس كلنا منشبه بعض بقصة اننا ولاد الحرب.. ما عنا شي ثابت..مو واثقين من أي شي..موتورين كل الوقت.. والتعب صفة بتجمعنا.. يمكن ناقصنا بس نقدر نحس ببعض لنرجع شعب واحد..

شايفين قديش في قصص بتفرقنا عن بعض..مدري ليش شايف يلي بيجعنا اكتر من كتير يلي بيفرقنا.. كتير قريب وواضح بس ما عم نقدر نوصلله.. متل السما..كلنا شايفينها بس ما حدا قدران يلمسها.. متل ما قلتلكم…. ناقصنا بس نحس ببعض لنرجع شعب واحد..

السياسيين كلهم مو شايفين ولا شغلة من يلي عم حكيت عنو فوق.. الجماعة عم يتنافسو عالسلطة ومو محتاجين مننا شي إلا انو نصفقلهم وقت بدهم ونصرخلهم وقت بدهم ونصوتلهم وقت بدهم ..

بقى عزيزي السوري

الوطنية انك تحس باخوك السوري..

الحرية والكرامة كمان انك تحس باخوك السوري..

حاج تعيطو صرعتونا….

 

(تامر صفوان قصيراوي)